قراءة تحليلة فى رواية الجريمة والعقاب: الجزءالأول و الثاني
 |
| رواية الجريمة والعقاب وتحليل بأسلوب بسيط وراقى |
Crime and Punishment novel and analysis in a simple and elegant style
*الفكرة:-محاولة دوستويفسكي تقديم فكرة الإنسان الأعلي أو الإنسان المتحكم في الواقع كفكرة لا أخلاقية تماماً و تتنافي بالفعل مع الواقع و تقديم دوستويفسكي لبعض الأسئلة الإيمانية و إنتهاءه إلي حاجة الإنسان بالقبول أكتر حتي من الإيمان و تقديم دوستويفسكي مذهب القبول كمذهب أكثر واقعية للإنسان اكتر من فكرة الإنسان الأعلي
ليه مينفعش تموت قبل ما تقرأ الجريمة و العقاب؟!
*تذكير ليا قد ما هو ليك- قراءة ممتعة*
معرفش الواحد ممكن يوصف الكتاب دا بإيه و لكن ممكن نقول انه أدب تقريباً إن لم يكن بالفعل وصل لمرحلة الكمال
✓ الحبكة:الكتاب ممكن تبقي حبكة القصة فيه أو هدف القصة الأساسي السطحي بسيط و أقرب للممل مجرد طالب جامعي مغترب في بطرسبرج بيقتل مرابية عشان فلوسها
لكن مع كل صفحة هتقلبها هتكتشف ان في جوانب ابعد للطالب دا و للناس حواليه بشكل عام مبني علي اسس نفسية مبهرة و بما أني جبت سيرة الشخصية الأساسية هتكلم عن الشخصيات
✓الشخصيات:
1- 𝑹𝒂𝒔𝒌𝒐𝒍𝒏𝒊𝒌𝒐𝒗 راسكولينكوف | 𝗜𝗡𝗧𝗝:
 |
| رواية الجريمة والعقاب وتحليل بأسلوب بسيط وراقى |
"روديون رومانوفيتش راسكولينكوف"
التجربة الإنسانية الكاملة
ممكن نقول عنه ببساطة تجسيد مبهر و ممتع للذات البشرية في اكتر حالاتها العنيدة و المزرية
الحقيقة ان روديا(راسكولينكوف) اكتر شخصية في الأدب ممكن تحبها و تكرها في نفس الوقت هتحب جدا اسلوبه الغريب و المعقد في التفكير محاولته الجاهدة و البائسة في اكتشاف نفسه و السخرية من القدر و المجتمع في نفس الوقت مع عدم اهتمام كامل لأي منهما بل هتحس انه شخصية منفصلة عن المجتمع و الواقع و هو بالفعل كدا لان دوستويفسكي من بدايات كتابته في "مذكرات قبو" و هو خرج لينا بفكرة "الإغتراب النفسي" الي انتشرت في الأدب بسرعة بعد ما كان الأدب في الوقت دا منصب علي حل القضايا الاجتماعية و السياسية بشكل أما مأساوي زي تولستوي او بشكل ساخر زي نيكولاي غوغول
فهتلاقي روديا اغلب الوقت منفصل جدا عن مشاعره رغم اضطرابه و قلقه و قدرته علي الإحساس النسبي بالندم و الخوف و الكره و الحب و القبول في النهاية
هتكره روديا و هتشفق عليه في نفس الوقت بسبب ضعفه الشديد رغم ثابت وجهه الي كان نادرا اصلا لكن هتلاحظ ان روديا يشبهني و يشهبك في ذات الوقت ضعيف مغلوب علي امره اغلب الوقت لكن متمرد و نفسه في حياة كريمة افضل و مجتمع اسمي عزيز النفس يرفض بكل الاشكال الإعتراف بضعفه و إيمانه بقضية الإنسان الأعلي "𝗨𝗯𝗲𝗿𝗺𝗲𝗻𝘀𝗰𝗵" او السوبرمان عند نيتشه الي نيتشه استوحاها من كتب دوستويفسكي و غيره.
و دوستويفسكي قرر يستخدم النموذج دا في شرح مبدأ "النفعية الأخلاقية" و الي انتهي في الاخر الي نفيها نسيبا
2- 𝑹𝒂𝒛𝒖𝒎𝒊𝒌𝒉𝒊𝒏 رازوميخين | 𝗘𝗡𝗙𝗝:
"ديمتري بروكوفيتش رازوميخين"
صاحب صاحبه الجدع ابن حتته و بلده
اكتر شخصية متعاونة و حبوبة في الحياة تحس انك عايز تحضنوا و تبسوا، اخلاقيا لا يعلي عليه طريقة تقديمه كانت جميلة و اسباب تعلقه بروديا مش مفهومة و غريبة ممكن تقول عليه Bisexual و تريح دماغك و ممكن تقول عليه
A man written by a woman من حلاوة شخصيته
رغم إيمانه الكامل بالأقليات و طموحاته الي سقفها عالي إلا انه صدمني لما لقيته بيشجع النظام الرأسمالي و الي بيتعارض بشكل ما مع شخصيته بالذات شخصية بتحب المساعدة بل ممكن يدخل نفسه في مشاكل بسبب الرغبة دي او بسبب حبه لشخص او سعيه لشيء معين شخصية علي النقيد من روديا متمسك جدا بالحياة و متألف جدا مع مشاعره
3- 𝑴𝒂𝒓𝒎𝒆𝒍𝒂𝒅𝒐𝒗 مارميلادوف | 𝗜𝗦𝗙𝗣:
"سيميون زاخاروفيتش مارميلادوف"
عندما يقع الإنسان في مستنقع ذاته
ممكن نقول عن سيميون انه هو راسكولينكوف و احنا بشكل عام لما تستلم للحياة و الأمر الواقع و يخليك تطرح جواك تسأل هو احنا الي خاضعين للحياة ام الحياة هي من تخضع لنا و لإرادتنا و هل الإنسان قادر علي التغيير او حتي قادر علي إنتزاع و لو نقطة واحدة سلبية و هل نقطة واحدة سودا في حياتك
ممكن نقول كمان عنه انه زوج مثالي لو كان قادر يتخلص من عادة الشرب لانه كان بيحاول في ظل فقره و ضغفه انه يعلم اولاده الصلاة و العبادة و القراءة و الكتابة و طبعاً مينفعش عدم ذكرنا لمدي حبه لكاترينا و اولادها و صونيا الي درجة العبادة بل عدم قدرته علي انه يشوف اي عيب في تصرفاتها و اهانتها ليه بل انه كان بيبقي سعيد انها بتهينه لو ان دا حاجة هتريحها و تخفف همومها
ظهوره كان قليل و لكن مؤثر جداً في العمق الأدبي للرواية و اضافة دوستويفسكي ليه و لأسرته كانت موفقة و جميلة
4- 𝑲𝒂𝒕𝒆𝒓𝒊𝒏𝒂 𝑰𝒗𝒂𝒏𝒐𝒗𝒏𝒂 كاترينا إيفانوفنا | 𝗘𝗦𝗧𝗝:
آاه و لعبت يا زهر و اتبدلت الأحوال و ركبت أول موجة في سكة الأوجاع
ممكن نقول عن كاترينا أنها اسم علي مسمي لآنها إعصار من مشاعر القلق و الإضطراب و التضحية و الندم و الحب و الأمل و التشكيك
إستخدمها دوستويفسكي في الرواية لتوضيح نظرته عن المرأة المضحية و عشان تبقي نموذج للأمومة
سابت بيت أبوها الي كان يعتبر علي درجة جنرال و تزوجت من شخص اقل منها إجتماعيا تحت مسمي الحب و ممكن نقول انها ندمت إلي حد ما و أحبته حب شديد جداً.
علي الرغم من كل مساوئ سيميون إلا انها احبته و حبت صونيا بنت سيميون من أم تانية حب خالص غير عادي و هنا دوستو كان بيحط نموذج اجتماعي راقي للأسرة فالمجتمع الروسي معروف انه اقرب المجتمعات لينا من حيث الثقافة الأسرية و من المجتمعات المحافظة
كاترينا بتطرح أسئلة احنا كلنا سألناها و لو مرة واحدة بل يمكن مازلنا بنسأل و بندور علي إجابة لماذا الله يسمح بالتجربة و يسمح بالشر و يسمح بإنعدام المساواة بين البشر و هل إنعدام المساواة دا احنا كبشر السبب فيه ولا هل دي طبيعتنا البشرية ولا دي الطبيعة بشكل عام و أنهي دوستو الأسئلة دي بشكل مبهم و واضح في نفس الوقت لأن كاترينا قبل موتها مباشرة اصيبت بالجنون و ملقيتش أجوبة لأي سؤال من دول في إشارة الي مصير الإنسان المتشكك ألا و هو استمرار الشك فقط دون إجابات و في نفس الوقت دوستويفسكي محاوش يجاوب أي من هذه الأجوبة كإشارة تشجيع للقراء للبحث عن إجابات تلك الأسئلة
5- 𝑺𝒐𝒏𝒚𝒂 صونيا | 𝗜𝗦𝗙𝗝:
 |
| رواية الجريمة والعقاب وتحليل بأسلوب بسيط وراقى |
ملاك الرحمة و المغفرة.
«آمِنْ بِالرَّبِّ يَسُوعَ الْمَسِيحِ فَتَخْلُصَ أَنْتَ وَأَهْلُ بَيْتِكَ»." (أع 16: 31).
تاني دوستو بيوضح نظرته عن المرأة أن المرأة كتلة حب و تضحية في سبيل من تحب و إن المرأة بتحب في الأساس لأجل إحساسها بالرغبة في التضحية بنفسها و يمكن تكون نظرة سليمة في وقت كتابة الرواية لكنها في زمنا المعاصر انتهت و إندثرت
صونيا شخصية بسيطة جداً علي السطح عميقة المشاعر بشكل غريب تبان ضعيفة لكنها قوية جداً مؤمنة جدا بالله مع سنة هوس و جنون و هو دا المطلوب في الإيمان و التصديق بأي فكرة
مثال علي الإنسانية و العطاء و الإلتزام و الصمود قدرت تسامح كل من كان السبب في فقدانها لشرفها و عذريتها بدون رغبتها بل إنها كانت بتتعامل معاهم بوداعة و محبة حقيقية و ممكن نعتبرها صوت للضمير في الرواية.
6- 𝑷𝒐𝒓𝒇𝒊𝒓𝒚 𝑷𝒆𝒕𝒓𝒐𝒗𝒊𝒄𝒉 بورفيري | 𝗘𝗡𝗧𝗣:
لست من الصالحين و محدش منهم فعلاً
من بداية ظهوره في الرواية و ممكن تعتبره انسان حقير و ممكن تعتبره علي النقيد انسان ذو مبادئ و هو الحقيقة ولا واحد من دول شخصية عبثية و بيستمتع بالبعث دا و بيستمتع بإنه يعبث بالناس و يخش يهز افكارهم لمجرد الإستكشاف و المتعة شخصية كانت مكتوبة مش لأجل توضيح جانب نفسي معين فيه هو قد ما هو لتوضيح جوانب في شخصية روديا من خلال فصلين دارت مناقشة بينه و بين روديا من أمتع الفصول في الأدب كله توضيح مبسط لفكرة السوبرمان و مدي مصداقية الفكرة و قابلية تنفيذها شخصية بتعتمد علي قانون الجذب بشكل ما و في نفس الوقت يمتلك طبيعة صياد
7- 𝑺𝒗𝒊𝒅𝒓𝒊𝒈𝒂𝒊𝒍𝒐𝒗 سفيدريجيلوف | 𝗘𝗡𝗧𝗣:
"أركادي إيفانوفيتش سفيدريجيلوف"
لست من الصالحين و مش عايز ابقي منهم.. تقريباً
•اكتر شخصية حبيتها و اتلعقت بيها ظهور غامض و قوي اضاف لشخصيته فخامة ممكن نقول عليه هو راسكولينكوف و لكن بدون موانع و ضوابط أخلاقية
•كل مبيتكلم في الرواية اكتر كل ما هتكره لأنك عارف أن كلامه حقيقي جداً و قريب جداً للواقع الإنسان الأعلي هو إنسان قادر علي كسر الحدود لأجل المتعة و لأجل كسر ذاته و غروره و دا الي بيبان علي سفيدريجليوف فيما بعد انه كل أمنيته أنه يحس أنه شخص جيد و لو أمام إنسان واحد و لكن كيف السبيل و هو لا يجيد سوي الخداع و المكر فيمكن هو نفسه نفسه بيخادع نفسه برغبته دي و هو في الحقيقة مستمتع بشروره و حقارته.
•و بيطرح جواك تساؤل هل الإنسان محتاج يتغير أم انه يعايش الحياة و خلاص و هل حب الحياة و الخوف من الموت أساسيات أم ممكن ببساطة تعتبر الموت شيء و مدعاة للسخرية؟
و ممكن نعتبر سفيدريجليوف في فلسفة نيتشه هو وحش الواقع الراقد في الهاوية
8- 𝑷𝒚𝒐𝒕𝒓 𝑷𝒆𝒕𝒓𝒐𝒗𝒊𝒄𝒉 | 𝗘𝗡𝗧𝗝 / 𝑳𝒆𝒃𝒆𝒛𝒚𝒂𝒕𝒏𝒊𝒌𝒐𝒗 | 𝗘𝗡𝗙𝗣:
"بيوتر بتروفيتش لوزين"
I"أندريه سيميونوفيتش ليبيزياتنيكوف"
•الحداثة ضد التقاليد•
•حوار بين شخصيتين متشابهين و مختلفين جداً و توضيح لنظرة دوستويفسكي للنظام الرأسمالي و نظرة إشمئزازه ليه و دعمه الغير مباشر للنظام الإشتراكي و لكن مع تصحيح بعض المفاهيم الي وضحها دوستويفسكي و أشار ليها بلهجة إستجهان و سخرية
•و توضيح لفكرة خوف أصحاب رؤوس الأموال من أصحاب الفكر بإعتبارهم أجيال جديدة لا تحمل خبرة كافية و لكن شعلة شباب و حماسة و دعم الرأسمالين ليهم في بعض الأحيان لغرض إستغلال فكرهم بما يحقق مصالحهم او علي سبيل الردع و الي حصل في الحقيقة كان عكس كدا تماماً و حدثت ثورة حزب العمل الإشتراكي من جهة البلاشفة بقيادة فلاديمير لينين في أكتوبر ١٩١٧. و في النهاية نتسأل هل التمسك بالتقاليد هو الحل أم الإحلال و وضع قوانين جديدة للمجتمع هو الحل و هل في حل فعلاً لإختلاف وجهات النظر بين البشر؟
✓ إقتباسات:
نظر إليه راسكولينكوف و ضحك و قال
" نعم أنا كلي ملطخ بالدم"
"لأن كل إنسان تمر به لحظات لا مناص له فيها إلا أن يذهب إلي مكان ما، أي مكان!!"
"خطيئتك الكبري أنك ضحيت بنفسك و أهلكت نفسك و خنت نفسك سدي"
" كلما إزدادت حلكة الليل كلما زاد لمعان النجوم، و كلما زاد الحزن و الكربُ كلما أقترب الربُ"
النهاية:
•نهي دوستويفسكي الكتاب بروديا و هو في بداية رحلة قبوله للإله و للحياة و للمصير و القدر أكتر من الإختيار المبني علي أسس النزعة الإنسانية نحو التغيير مع وضع روديا في إطار من الحب لصونيا إشارة من دوستو ان الطريقة الوحيدة لتخطي الواقع المؤسف هو التمسك بالحب و التضحية لأجل الأخر.
************
♥دعوة للانضمام لمنصة مواهب شبابية♥
♥دعوة مفتوحة للمشاركة بكتابات المواهب الشابة فى هذا التبويب ((منصة مواهب شبابية ))
♥ارسلوا لنا مشاركاتكم على ♥
👇اضغط هنا للمراسلتنا👇
♥ وسنقوم بنشرها حال تمشيها مع السياسة التحريرية للمجلة ..المرحلة العمرية حتى عمر 30 عاما ..ارسلوا لنا صورتكم الشخصية والاسم الرباعى والمرحلة الدراسية .تقبلوا تحيات مجلس ادارة وتحرير المجلة .
💞💞💞💞💞
مرحبا بك اترك تعليقك فهذا يهمنا ويسعدنا واذا اعجبك موضوعاتنا ادعمنا بالمشاركة على وسائل التواصل الاجتماعى